हजारो समाजबांधवांचा सहभाग

शांतता, सलोखा व बंधुभावाच्या वातावरणात ईद उत्साहात साजरी

अमळनेर : ईद-उल-फित्रनिमित्त अमळनेर शहरातील मुस्लिम समाजाकडून बुधवारी भव्य जुलूस काढण्यात आला. शहरातील विविध भागांतून हजारो समाजबांधव या जुलूसमध्ये सहभागी झाले. शांतता, सलोखा, बंधुभाव आणि सामाजिक एकतेचा संदेश देत ईदचा उत्सव उत्साहात व शांततेत साजरा करण्यात आला.

दुपारी २ वाजेनंतर शहरातील विविध भागांतून जुलूस निघण्यास सुरुवात झाली. कसाली मोहल्ला, शाहआलम नगर, इस्लामपुरा, झामी चौक, अंदरपुरा, बाहेपुरा, गांधलीपुरा, जापान जिन, मिलचाळ यांसह विविध परिसरांतून मुस्लिम समाजबांधव मोठ्या संख्येने जुलूसमध्ये सहभागी झाले. धार्मिक उत्साहासोबतच शांतता, सामाजिक सलोखा आणि एकतेचा संदेश देत हा जुलूस शहरातील विविध मार्गांवरून मार्गक्रमण करत ईदगाह मैदानाकडे रवाना झाला.

पोलिस प्रशासनाचा चोख बंदोबस्त

ईदचा जुलूस शांततेत पार पडावा तसेच कायदा व सुव्यवस्था अबाधित राहावी, यासाठी पोलिस प्रशासनाकडून चोख बंदोबस्त ठेवण्यात आला होता. बंदोबस्तासाठी १ अपर पोलिस अधीक्षक, १ पोलिस उपअधीक्षक, २ पोलिस निरीक्षक, १५ दुय्यम अधिकारी, १२७ पोलिस कर्मचारी, ३ दंगा नियंत्रण पथके, २ ट्रॅकिंग फोर्स पथके आणि ७५ होमगार्ड तैनात करण्यात आले होते.

जुलूसच्या मार्गावर तसेच संवेदनशील ठिकाणी पोलिसांचा बंदोबस्त ठेवण्यात आला होता. पोलिस प्रशासनाच्या नियोजनासोबतच मुस्लिम समाजबांधवांनी केलेल्या सहकार्यामुळे संपूर्ण जुलूस शांततेत पार पडला.

सायंकाळी ५ वाजता ईदगाह मैदानावर जुलूस दाखल

सायंकाळी सुमारे ५ वाजता विविध भागांतून निघालेला जुलूस ईदगाह मैदानावर दाखल झाला. यावेळी शहरातील विविध भागांतून आलेले हजारो समाजबांधव एकत्र आले. त्यानंतर सर्वांनी एकत्रितपणे असरची नमाज अदा केली.

ईदनिमित्त अमळनेर शहरात दिवसभर उत्साहाचे वातावरण होते. मुस्लिम समाजबांधवांनी एकमेकांना ईदच्या शुभेच्छा देत आनंद व्यक्त केला. लहानांपासून ज्येष्ठांपर्यंत नागरिकांनी मोठ्या उत्साहाने ईद साजरी केली. विविध भागांतून आलेल्या समाजबांधवांमध्ये एकोपा, बंधुभाव आणि सामाजिक सलोख्याचे वातावरण दिसून आले.

प्रशासनाला सहकार्य; अनुचित प्रकार टळला

ईदचा जुलूस शांततेत पार पडण्यासाठी पोलिस प्रशासनाने केलेल्या नियोजनाला मुस्लिम समाजबांधवांनी सकारात्मक प्रतिसाद देत प्रशासनाला सहकार्य केले. पोलिसांचा चोख बंदोबस्त आणि नागरिकांनी राखलेली शिस्त व संयम यामुळे कोणताही अनुचित प्रकार घडला नाही.

अमळनेरच्या मुस्लिम समाजाकडून ईदच्या निमित्ताने शांतता, बंधुभाव, सामाजिक एकता आणि सलोख्याचा संदेश देण्यात आला. प्रशासन व नागरिकांच्या समन्वयामुळे ईदचा उत्सव उत्साहपूर्ण, आनंदी आणि शांततामय वातावरणात पार पडला.

महेश संदानशिव  दिव्य लोकतंत्र ब्युरो, अमळनेर