अमळनेरमध्ये संतप्त सवालांचा भडिमार!

अमळनेर : लाचलुचपत प्रतिबंधक विभागाच्या अलीकडील ट्रॅपनंतर अमळनेर तालुक्यात केवळ कारवाईच नव्हे, तर संपूर्ण प्रशासनाच्या विश्वासार्हतेवरच प्रश्नचिन्ह उभं राहिलं आहे. काही आरोपी जाळ्यात अडकले, पण “खरा सूत्रधार कोण?” हा जळजळीत प्रश्न अजूनही हवेतच आहे.
सर्वात गंभीर बाब म्हणजे, ट्रॅपमध्ये अडकलेले आरोपी वारंवार तहसीलदारांच्या दालनात दिसत होते, अशी माहिती समोर येतेय. मग हा केवळ योगायोग होता का, की यामागे काही ‘अनकथित समीकरणं’ होती?
“दालनात मुक्त वावर… आणि प्रशासन अनभिज्ञ?” हा दावा सामान्य नागरिकांना पटणं कठीण जातंय.

“जर सर्व काही स्वच्छ असेल, तर संशयाची सावली इतकी गडद का?”
“तहसील कार्यालय ‘सार्वजनिक सेवा केंद्र’ आहे की काही मोजक्या लोकांसाठी ‘मोकळं मैदान’?”
अशा थेट, टोकदार प्रश्नांनी आता तालुका ढवळून निघतोय.

दरम्यान, वाळू व मुरूम उत्खननाचे प्रकार, बोगस शेतकरी दाखले, आणि अल्पावधीत वाढलेले जमीन व्यवहार, या सगळ्यामुळे चित्र अधिकच धूसर बनत आहे.
“ज्यांच्याकडे कालपर्यंत शेती नव्हती, त्यांच्या नावावर आज शेकडो एकर शेती कशी?” हा सवाल केवळ चर्चा नाही, तर चौकशीची मागणी बनू लागलाय.

या सर्व घडामोडींमध्ये सर्वात मोठा प्रश्न असा की, ही केवळ खालच्या पातळीवरील कारवाई आहे, की वरपर्यंत पोहोचणारी साखळी?

आता जनतेची एकच अपेक्षा आहे ती म्हणजे, सखोल , निष्पक्ष आणि पारदर्शक चौकशी, सर्व संबंधितांची भूमिका स्पष्ट करणे, आणि “खरं चित्र” जनतेसमोर आणणे अन्यथा, “कारवाई झाली” इतक्यावर समाधान मानणं नागरिकांना आता मान्य नाही.