11वी, 12वीला शिक्षक नाहीत, तर काही वर्गांची हजेरी देखील तयार नाही

मुख्याध्यापक अनभिन्न

अमळनेर : तालुक्यातील पातोंडा येथील श्री दत्त उच्च माध्यमिक विद्यालय व कनिष्ठ महाविद्यालय सध्या रामभरोसे असून या शाळेला कुणीही वाली राहिलेला नाही. ही शाळा 100 टक्के अनुदानित असूनही कनिष्ठ महाविद्यालयात म्हणजे 11वी व 12वी वर्गासाठी शिक्षक देखील नसल्याने या विद्यार्थ्यांचे भविष्य धोक्यात आहे. 11वी 12वी हा आयुष्यात महत्वाचे वळण आहे. मात्र या वळणाच्या सुरुवातीलाच अशा पद्धतीने विद्यार्थ्यांचा असा शैक्षणिक घात होत असेल तर याला जबाबदार कोण असा सवाल उपस्थित होतो.

शाळा प्रशासनात महत्वाचा दुवा म्हणजे मुख्याध्यापक असतो, त्या मुख्याध्यापकाला देखील शाळा सांभाळण्याचे ज्ञान नसून मुख्याध्यापक अनेक बाबींपासून अनभिन्न असल्याचेही बोलले जात आहे. कारण या शाळेत काही वर्गांचे हजेरी मस्टर देखील तयार नाही. शाळेत विद्यार्थी संख्या देखील कमालीची घटत आहे.

शिक्षक देखील जेव्हा मनाला वाटते तेव्हा घरी राहून जातात, विद्यार्थ्यांचे वेळेवर तास होत नाहीत. तर पवार नावाचा कर्मचारी हा अनेक लोकांना दम देत असल्याचेही बोलले जात आहे. म्हणून या शाळेकडे प्रशासनाने लक्ष द्यावे अशी मागणी होत आहे.