कायदा पालन संघ व दिव्य लोकतंत्रच्या लढ्याला यश

अमळनेर : तालुक्यातील भोरटेक शाळा बंद करण्याचा एकतर्फी निर्णय अमळनेर पंचायत समिती प्रभारी गटशिक्षणाधिकारी रावसाहेब मांगो पाटील यांनी घेतला होता. व दिनांक 16 ऑगस्ट रोजी शाळा बंद केली होती.  या बाबत कायदा पालन संघ, जळगाव यांनी राज्य शासन व मुख्य कार्यकारी अधिकारी, जिल्हा परिषद जळगाव यांच्याकडे तक्रार केली होती तर दिव्य लोकतंत्रने देखील या बाबत वृत्त प्रकाशित करत गटशिक्षणाधिकारी यांनी चुकीचा निर्णय घेतला असल्याचे वृत्त प्रकाशित केले होते. हे वृत्त राज्य शासनातील मंत्री, व जिल्ह्यातील अधिकाऱ्यांना देखील पाठवण्यात आले होते. त्यानुसार मोठ्या हालचाली सुरू झाल्या होत्या.

तिकडे कायदा पालन संघाने केलेल्या तक्रारीची दाखल घेत ग्रामविकास व पंचायत राज मंत्री जयकुमार गोरे व इतर मंत्र्यांनी देखील योग्य ती चौकशी करून कारवाई करावी असे आदेश दिले होते. हे आदेश दिनांक 25 ऑगस्ट रोजी मंत्री गोरे यांच्याकडून देण्यात आले होते. त्यानुसार झालेली चौकशी व गावकऱ्यांच्या मागणीने आज 19 रोजी जिल्ह्यातील अधिकाऱ्यांनी भेट देऊन शाळा सुरू केली आहे. यामुळे गावकऱ्यांमध्ये आनंदाचे वातावरण निर्माण झाले आहे.

दरम्यान दिनांक 18 ऑगस्ट पासून कायदा पालन संघ व 22 ऑगस्ट पासून दिव्य लोकतंत्र या बाबत लढा देत होते, म्हणून आता कोणाच्या लढ्याला यश आले हे वाचकांनी ठरवावे हीच अपेक्षा !