इच्छुक उमेदवारांची मोठी गर्दी

अमळनेर : सध्या भाजप, शिवसेना व राष्ट्रवादी या तीन पक्षांची महायुती असल्याने आगामी जिल्हा परिषद निवडणूकीत उमेदवारी देण्यासाठी पक्षश्रेष्ठी व पुढाऱ्यांची चांगलीच डोकेदुखी होणार असल्याचे दिसुन येते. इच्छुक उमेदवार अनेक असून त्यांची कामे देखील सुरू झाली आहेत. ज्यांच्या – त्यांच्या गटात इच्छुक उमेदवार चांगलीच कामाला लागली आहेत. तर अनेक उमेदवार महायुती असली किंवा आम्हाला उमेदवारी मिळाली नाही तरी आम्ही उमेदवारी करू असेही म्हणत आहेत. अनेक मोठ्या व पहिल्या फळीतील पुढाऱ्यांची तयार सुरू असून आपापल्या गटात ते रोज फिरतांना दिसत आहेत.

सर्वांत मोठी जिल्हा परिषद निवडणूक दंगल ही मुडी-मांडळ गटात होणार असून यात भाजप नेते तथा पंचायत समितीचे माजी उपसभापती भिकेश पावभा पाटील तर राष्ट्रवादीचे तथा अमळनेर बाजार

समितीचे विद्यमान सभापती अशोक आधार पाटील हे जिल्हा परिषदेसाठी इच्छुक आहेत. दोघांचेही काम जोरात सुरू असून यात भिकेश पाटील यांची बाजू मजबूत असल्याचे बोलले जात आहे.

तर तिकडे जानवे – मंगरूळ गटात विद्यमान खासदार स्मिता वाघ यांच्या कन्या भैरवी वाघ-पलांडे यांचीही जोरदार तयार सुरू असल्याचे कळते

तर त्याच गटामध्ये भाजपचे नवनियुक्त जिल्हा कार्यकारिणी सदस्य तथा माजी जिल्हा परिषद सदस्य येथील संदीप पाटील हे देखील इच्छुक असुन या गटात देखील पुढाऱ्यांना मोठी डोकेदुखी होणार आहेत.

पातोंडा – अमळगाव भागात देखील भाजपचे महेंद्र पाटील व राष्ट्रवादीचे निलेश पाटील व गिरीश सोनजी पाटील तिघे

इच्छुक आहेत आणि जर मागील आरक्षणानुसार ही जागा अनुसूचित जातीसाठी राखीव झाली तर माजी पंचायत समिती सदस्य निवृत्ती बागुल येथून इच्छुक आहेत.

तिकडे मारवड – कळमसरेत विद्यमान आमदार अनिल पाटील यांच्या धर्मपत्नी तथा जिल्हा परिषद माजी सदस्य जयश्री पाटील,

भाजपचे ऍड. व्ही.आर.पाटील, जितेंद्र उर्फ पिंटू राजपूत हे इच्छुक असून

 अजून एक इच्छुक गुडघ्याला बाशिंग बांधून तयार आहे. 

तर दहिवद मध्ये देखील काही मंडळी तयार असून आरक्षण काय निघते यावर लक्ष लागून आहे.

अनुसूचित जमातीसाठी जर ही जागा आरक्षित झाली तर सामाजिक कार्यकर्ते पन्नालाल मावळे, राष्ट्रवादीचे भाईदास सोनू भिल्ल,

शिवाजी पारधी आणि जर सर्वसाधारण निघाली तर दहीवदच्या माजी सरपंच सुषमा वासुदेव पाटील,

माजी जिल्हा परिषद सदस्य मीना पाटील आदि इच्छुक आहेत.

ही नावे सध्या चर्चेत असलेली असून इतर अजून पुढे येऊ शकतात. म्हणून आता संधी कुणाला द्यायची हा मोठा पेच महायुती समोर असून पुढारी व पक्षश्रेष्ठींची डोकेदुखी चांगलीच वाढणार आहे.