विकास, परिवर्तन आणि जनसंपर्क यांच्या आधारे होणार लढत

अमळनेर : नगरपरिषद सार्वत्रिक निवडणूक २०२५ची घोषणा होताच अमळनेर शहरातील राजकीय हालचालींना वेग आला असून प्रभाग क्र. १५ (अ) मध्ये निवडणूक चुरशीची होण्याची चिन्हे दिसू लागली आहेत. या पार्श्वभूमीवर राष्ट्रवादी काँग्रेस पक्ष (शरदचंद्र पवार गट) तर्फे उमेदवारी जाहीर झालेल्या प्रशांत मनोहर निकम यांनी रविवार, २३ नोव्हेंबर २०२५ रोजी सकाळी १० वाजता दुर्गेश्वर महादेव मंदिर, सप्तश्रृंगी कॉलनी, शिरुड नाका येथे नारळ फोडून आपल्या प्रचाराची दमदार सुरुवात केली.

विधिवत पूजा आणि शुभारंभ सोहळ्याला उस्फूर्त प्रतिसाद

शुभारंभ कार्यक्रमाची सुरुवात देवदर्शन घेऊन झाली. धार्मिक विधी संपन्न झाल्यानंतर निकम यांनी नारळ फोडून प्रचार यात्रेचे उद्‌घाटन केले. या प्रसंगी प्रभागातील महिला, युवक, ज्येष्ठ नागरिक तसेच पक्षाचे पदाधिकारी व कार्यकर्ते मोठ्या उत्साहाने उपस्थित होते. वातावरणात ढोलताश्यांच्या गजरात “विकास हवा – निकम द्या” असे घोषवाक्य दुमदुमत होते.

‘जनतेच्या आशीर्वादाने विकास करणार’ – निकम

यावेळी बोलताना प्रशांत निकम म्हणाले की, “प्रभागातील नळजोडणी, ड्रेनेज, पथदिवे, रस्ते, सभोवतालची स्वच्छता या अनेक मूलभूत प्रश्नांची तातडीने सोडवणूक करून विकासाचा नवा अध्याय सुरू करणे हा माझा संकल्प आहे. जनतेच्या आशीर्वादाने आणि पक्षाच्या पाठिंब्याने हे प्रभागाचे चित्र बदलण्याचे काम करणार आहे.”

प्रभात फेरी ते घरदारी भेट – उत्साही जनसंपर्क

नारळ शुभारंभानंतर निकम यांच्या नेतृत्वाखाली भव्य प्रचार रॅली काढण्यात आली. रॅलीने प्रभागातील प्रमुख वस्ती, कॉलन्या आणि बाजारपेठेतून मार्गक्रमण केले. या दरम्यान निकम यांनी घरोघरी जाऊन मतदारांना भेट देत त्यांच्या अडचणी जाणून घेतल्या.

यावेळी वृद्ध नागरिकांनी त्यांना आशीर्वाद दिले, महिलांनी विकासाच्या अपेक्षा व्यक्त केल्या तर तरुणांनी रोजगार, सुविधा आणि स्वच्छतेच्या मुद्द्यांवर चर्चा केली. निकम यांनी प्रत्येक प्रश्न नोंदवत तातडीने तोडगा काढण्याचा विश्वास दिला.

पक्ष पदाधिकारी आणि कार्यकर्त्यांचा सक्रिय सहभाग

या संपूर्ण कार्यक्रमात राष्ट्रवादी काँग्रेस (शरद पवार) गटाचे पदाधिकारी आणि कार्यकर्त्यांनी मोठ्या प्रमाणावर सहभाग घेतला. त्यांनी प्रभागातील नागरिकांना निकम यांच्या कार्यपद्धतीबद्दल, त्यांच्या सामाजिक बांधिलकीबद्दल आणि विकासाभिमुख दृष्टिकोनाबद्दल माहिती देत प्रचार गतीमान केला.

निवडणुकीत चुरस वाढण्याची चिन्हे

निकम यांच्या या दमदार शुभारंभामुळे प्रभाग १५ (अ) मधील निवडणूक अधिक रंगतदार होण्याची शक्यता वर्तवली जात आहे. मतदारांमध्ये उत्सुकता वाढली असून प्रभागातील राजकीय घडामोडींना आता नवी दिशा मिळाल्याचे चित्र दिसून येते.