पूर्वीच्या कामगिरीवर मतदारांची पावती

अमळनेर : अमळनेर नगरपरिषदेच्या आगामी निवडणुकांची रणधुमाळी सुरू असताना प्रभाग क्रमांक 3 (अनुसूचित जमाती राखीव) मध्ये माजी नगरसेविका शोभाबाई भिवसन कढरे यांनी आपल्या दमदार प्रचारामुळे भक्कम आघाडी घेतली आहे. प्रभागातील विविध वस्ती, शेजारी, गल्लीबोळात त्यांचा प्रचार जोरदार वेगाने सुरू असून सर्वच वयोगटातील नागरिकांकडून त्यांना उत्स्फूर्त प्रतिसाद मिळत आहे.

शोभाबाई कढरे या पूर्वी नगरसेविका म्हणून कार्यरत असताना प्रभागातील मूलभूत सुविधांच्या उभारणीसाठी त्यांनी केलेले प्रयत्न आजही नागरिकांच्या स्मरणात आहेत. रस्ते-पाणी-स्वच्छता अशा अत्यावश्यक सुविधांसोबतच समाजकल्याण, महिलाविकास आणि पात्र लाभार्थ्यांना योजना मिळवून देण्यासाठी त्यांनी विशेष पुढाकार घेतला होता. त्यांच्या कार्यशैलीत असलेली साधेपणा, लोकाभिमुखता आणि प्रामाणिकपणा यामुळे त्या प्रभागात लोकप्रिय झाल्या होत्या.

या पार्श्वभूमीवरच मतदार पुन्हा एकदा “शोभाबाईच हव्यात” असे स्पष्टपणे सांगताना दिसत आहेत. प्रभागात फिरताना अनेक नागरिकांनी त्यांच्या कार्यकाळात झालेली प्रगती, समस्यांचे तातडीने निराकरण आणि लोकांप्रती असलेली बांधिलकी यांचे विशेष कौतुक केले. विशेषतः महिला व ज्येष्ठ नागरिक यांच्या समस्या ऐकून त्यावर उपाययोजना करणे हे त्यांचे वैशिष्ट्य असल्याचे मतदारांनी सांगितले.

सध्या चालू असलेल्या प्रचार दौऱ्यात शोभाबाई कढरे यांनी प्रत्येक घरी जाऊन मतदारांशी संवाद साधत प्रभागातील पुढील विकास आराखडा समोर मांडला आहे. “प्रभागातील शिल्लक राहिलेल्या सुविधा वेळेत पूर्ण करणे, स्वच्छतेवर भर, युवकांसाठी उपक्रम, पाणीपुरवठ्याची अधिक काटेकोर व्यवस्था आणि सुरक्षित वातावरण” यांसारखी अनेक मुद्दे त्यांनी आपल्या निवडणूक प्रचारात मांडले आहेत.

प्रचारादरम्यान कार्यक्रमस्थळी गर्दी, कार्यकर्त्यांचा उत्साह आणि नागरिकांचा सहभाग पाहता प्रभाग क्रमांक 3 मध्ये त्यांची निवडणूक लढत अधिक रंगतदार होत असल्याचे चित्र दिसत आहे.