सामाजिक कार्याच्या आधारे मतदारांचा विश्वास दृढ

अमळनेर : नगरपरिषद निवडणूक २०२५ च्या तयारीला वेग येत असताना प्रभाग क्रमांक 2 (अनुसूचित जाती राखीव) मध्ये राजकीय हालचाली वाढू लागल्या आहेत. शहर विकास आघाडीकडून देवेंद्र भानुदास कांबळे यांच्या उमेदवारीला अधिकृत मान्यता देण्यात आली असून त्यांच्या प्रवेशाने स्थानिक राजकारणात चैतन्य निर्माण झाले आहे.

प्रताप कॉलेजमधील विद्यार्थी जीवनापासूनच सामाजिक उपक्रमांमध्ये सक्रिय असलेले देवेंद्र कांबळे यांनी मागील काही वर्षांत वंचित घटकांच्या प्रश्नांवर, शैक्षणिक विकासावर आणि युवकांच्या अडचणींवर सातत्याने काम केले आहे. या कार्याची दखल घेत प्रभागातील नागरिकांमध्ये त्यांच्या नावाबद्दल विश्वासाची भावना दृढ झाली आहे.

उमेदवारी जाहीर झाल्यानंतर प्रतिक्रिया व्यक्त करताना कांबळे म्हणाले,“प्रभाग 2 मधील प्रत्येक कुटुंबापर्यंत विकासाची साधने पोहोचवणे हे माझे प्रमुख लक्ष्य आहे. शिक्षण, पिण्याचे पाणी, स्वच्छता, दर्जेदार रस्ते आणि युवकांसाठी रोजगाराच्या संधी — या प्रत्येक क्षेत्रात परिणामकारक काम करणार आहे.”

कांबळे यांच्या नावाची घोषणा होताच शहर विकास आघाडीच्या कार्यकर्त्यांमध्ये उत्साहाचे वातावरण पसरले आहे. गाठीभेटी, घरदौरे आणि नियोजन बैठका सुरू झाल्या असून प्रचाराची तयारी वेग घेत आहे. प्रभागातील अनेक नागरिकांनी शुभेच्छा देत त्यांच्या उमेदवारीचे स्वागत केले आहे.

प्रभाग क्रमांक 2 मधील आगामी राजकीय घडामोडींमध्ये आता कांबळे यांचा विकासाभिमुख दृष्टिकोन आणि सामाजिक सेवांचा वारसा हा प्रमुख मुद्दा ठरणार असल्याचे संकेत मिळत आहेत. पुढील काही दिवसांत प्रचाराला आणखी वेग येणार, हे निश्चित.