टवाळखोर रोडरोमिओंवर बसणार खाखीचा वचक…

सुमारे ८ रोडरोमिओंवर अमळनेर पोलिसांची कारवाई…

अमळनेर : शहरात महाविद्यालयांच्या परिसरात तसेच गर्दीच्या ठिकाणी गर्दीचा फायदा घेऊन महिला व मुलींची छेडखानी करण्याचे प्रकार घडत असल्याची तक्रारी पोलीस स्टेशनला प्राप्त झाल्या होत्या. सदर तक्रारीचा अमळनेर वरिष्ठ पोलीस निरीक्षक विकास देवरे यांनी गांभीर्य पूर्वक विचार करत शहरातील प्रताप महाविद्यालय व धनदाई महाविद्यालय परिसरात कारवाई करण्याचे नियोजन केले. प्रताप महाविद्यालय व धनदाई महाविद्यालय या दोन्ही महाविद्यालयाच्या परिसरात दोन वेगवेगळे पथके तयार करून पथकांना कारवाई करण्याचे आदेश दिले होते.
दोन्ही पथकांनी दोन्ही महाविद्यालयीन परिसरात एकूण ८ रोमियोंना हेरून त्यांच्याकडून महाविद्यालयीन ओळखपत्राची मागणी केली व परिसरात फिरण्याचा किंवा थांबण्याचा उद्देश विचारला परंतु त्यांच्याकडे ओळखपत्र नसल्याने व उडवाउडविची उत्तर देत असल्याने परिसरात थांबण्याचे सबळ कारण नसल्याने वरील एकूण ८ मुलांना रोमिओगिरी करताना तसेच सार्वजनिक शांततेच्या भंग करून आरडा – ओरड करताना मिळून आल्याने त्यांच्यावर प्रचलित कायद्यानुसार कारवाई करण्यात आलेली आहे.