“आई मी येतांना नोकरी घेऊन येतो व पेढ्यांचा बॉक्स आणतो” म्हणत गेलेल्या अक्षयचे प्रेत पाहून आईने फोडला टाहो

पोलीस भरती दरम्यान अमळनेरच्या तरुणाचा मृत्यू, मात्र त्या परिवारास भेटण्याबाबत राजकिय उदासीनता

मतं मागायला येतात मग आमच्या दुःखात का नाही ?

नातेवाईक व मित्र परिवार आक्रमक

अमळनेर : येथील तरुणाचा शनिवारी बाळेगाव येथील राज्य राखीव पोलीस दल – क्रमांक ११च्या भरती दरम्यान मृत्यू झाला. अक्षय मिलिंद बिऱ्हाडे असे मृत तरुणाचे नाव असून तो अमळनेर शहरातील प्रबुद्ध कॉलनीत राहत होता.

आई व वडील हातमजुरी करून आपल्या संसाराचा गाडा चालवत होते. अत्यंत कष्टाने एक मुलगा व एक मुलगी यांना त्यांनी वाढवले व शिकवले देखील…. आपल्या आई वडिलांच्या कष्टाची जाण ठेवत अक्षय पोलीस भरतीसह विविध भरत्यांची तयारी करीत होता. गेल्या तीन वर्षांपासून तो अवघ्या काही गुणांनी भरती होण्यास राहून जात होता. मात्र या वर्षी मी नक्की भरती होईल याचा त्याला आत्मविश्वास होता व तो दिनांक २७ जून रोजी घरून निघतांना त्याच्या आईला सांगूनही गेला होता. की “आई मी आता येतांना पेढ्यांचा बॉक्स घेऊन येईल” म्हणजे नौकरीच घेऊन येईल. मात्र काळाचा घाला व प्रशासकीय तथा राजकीय उदासीनतेने २९ रोजी म्हणजे शनिवारी दुपारीच त्याचा जीव गेला व त्याने आपल्या आईला दिलेला शब्द अक्षय पूर्ण करू शकला नाही. आज भरती होऊन अक्षय आईसाठी पेढा आणणार होता मात्र त्याच्या आईला प्रशासनाच्या ढिसाळ नियोजनामुळे आज शेवटी अक्षयचे प्रेतच दिसले.

अक्षय बिऱ्हाडे याचा धावण्याचा चांगल्या प्रकारे सराव झाला होता. त्याने मागील वर्षीच्या मैदानी चाचणीत ९१ गुण मिळवले होते मात्र तेव्हाही नशिबाने खेळ मांडला आणि ९३ गुणांचा कट ऑफ आला व अक्षय अवघ्या २ गुणांसाठी भरती होण्यापासुन वंचित राहिला. या वर्षी देखील त्याने आपण भरती होऊच असा निर्धार केला होता. मैदानी चाचणीचे इतर प्रकार होऊन तो ५ किलोमीटर धावण्यासाठी गेला आणि ५ किलोमीटर धावून अवघे १०० मीटर बाकी असतांना अक्षयला चक्कर आला व तो खाली कोसळला. त्याला काय झाले ? तो का कोसळला याची माहिती घेणे सोडून त्याला सुमारे दोन ते तीन तास बाजूला झोपवून ठेवण्यात आल्याचे त्याच्या मित्रांनी सांगितले आहे. काही जागांची भरती घेणाऱ्या या प्रशासनाने हजारो विद्यार्थ्यांना या भरतीत सामावून घेतले व त्यांच्याकडून प्रत्येकी सुमारे ३०० रुपये घेतले मात्र पाहिजे असेल ती सुविधा तेथे दिली गेली नाही. अलट विद्यार्थ्यांकडून लिहून घेतले जाते की, काही झालं की प्रशासन जबाबदार नाही ? मात्र आज प्रशासनाच्या बेजबाबदार पणामुळे त्या आई – वडिलांची म्हातारपणाची काठी गेली याच काय असा प्रश्न त्याच्या मित्रांनी उपस्थित केला आहे.

अक्षयला चक्कर येऊन काही तास झाले त्याला जास्त त्रास व्हायला लागला तेव्हा त्याने त्याच्या आत्याभाऊला फोन केला व त्याला सगळी हकीगत सांगितली व म्हटला की माझ्या ताईला फोन करून सांग की दवाखान्यात ये व येतांना नारळपाणी घेऊन ये….!
त्याची बहीण त्याच्या जवळ पोहचते तोपर्यंत अक्षयची प्रकृती अत्यंत खालावली गेली व काही तासांनी तो जगाचा निरोप घेऊन निघाला. इकडे अमळनेरला नातेवाईकांना / मित्रमंडळींना माहिती झाले. मात्र मनाने नाजूक असलेल्या आईला व हृदयविकाराचे रुग्ण असलेल्या अक्षयच्या वडिलांना हे माहिती करण्यात आले नाही, त्यांना फक्त एवढेच सांगण्यात आले की त्याची प्रकृती गंभीर आहे. सकाळी जेव्हा त्यांना माहीत झाले तेव्हा त्यांनी टाहोच फोडला आणि अनेकांचे मन सुन्न झाले.

मात्र तोपर्यंत टीव्ही, वृत्तपत्रे यांसह अनेक ठिकाणी बातम्या प्रसारित झाल्या. ही बातमी ऐकून अनेकांचे काळजाचे ठोके चुकले मात्र अमळनेर तालुक्यातील राजकीय लोकं, मंत्री यांच्यासह जळगाव जिल्ह्यातील मंत्री यांनी या विषयाला जास्त महत्व दिले नाही. काही माजी आमदार व आगामी विधानसभा निवडणुकीसाठी गुडघ्याला बाशिंग बांधून तयार असलेले उमेदवार, तसेच इतर काही अमळनेर तालुक्यातील स्वयंघोषित पुढारी यांनी मात्र या विषयाकडे जास्त लक्ष देणे टाळले आहे. म्हणून अक्षयचे मित्र तहसील कार्यालयाजवळ आंदोलनात म्हणतात की मतं मागायला कसे येतात मग आमच्या दुःखात का नाही येतं ?
आता पुढे मात्र अमळनेर तालुक्याचेच व्यक्ती मंत्री आहेत, खासदार आहेत व इतर लोकप्रतिनिधी… यांनी प्रशासनाकडे पाठपुरावा करून अक्षयला व त्याच्या परिवाराला न्याय मिळवून द्यावा एवढेच !

अक्षयच्या अंत्यदर्शनासाठी माजी आमदार शिरीष चौधरी, माजी नगर सेवक बाळासाहेब संदानशिव, नरेंद्र संदानशिव, प्रा. अशोक पवार, संदीप घोरपडे, ऍड. तिलोत्तमा पाटील, राजेंद्र यादव यांना सोडून इतर पुढारी दिसले नाहीत.