“नाव मोठं, लक्षण खोटं” की जनतेच्या विश्वासाला तडा?

अमळनेर : “हत्तीचे दात दाखवायला वेगळे, खायला वेगळे” ही म्हण सध्या अमळनेरच्या पाणीपुरवठा व्यवस्थेला तंतोतंत लागू पडत असल्याची चर्चा शहरात रंगू लागली आहे. सत्तेत येण्यापूर्वी “२५ वर्षांत टाक्या धुतल्या नाहीत” असा गाजावाजा करणाऱ्यांनी आता टाक्या धुतल्याचा दावा केला; मात्र नागरिकांच्या नळातून आजही गढूळ पाणीच वाहत असल्याने संतापाची लाट उसळली आहे.
“थेंबे थेंबे तळे साचे, पण दुर्लक्षाने विश्वासाचे तळे आटते,” अशी भावना नागरिक व्यक्त करत आहेत. मोठ्या अपेक्षेने आणि बदलाच्या आशेने अमळनेरकरांनी सत्तेची धुरा नव्या हातात दिली; मात्र मूलभूत गरज असलेल्या स्वच्छ पाण्याच्या प्रश्नावर अद्यापही समाधानकारक तोडगा निघालेला दिसत नाही.

टाक्या स्वच्छ… मग पाणी गढूळ का?
सत्ताधाऱ्यांनी टाक्या स्वच्छ केल्याचे सांगितले, परंतु प्रत्यक्षात नागरिकांच्या घरापर्यंत पोहोचणारे पाणी अजूनही गढूळ असल्याने अनेक प्रश्न उपस्थित होत आहेत. जर टाक्या स्वच्छ झाल्या असतील, तर पाण्यातील गाळ आणि अस्वच्छता येते कुठून? दोष जलवाहिन्यांचा आहे का? गाळ साचल्याचा आहे का? की संपूर्ण पाणीपुरवठा व्यवस्थेतील त्रुटींचा? याचे उत्तर नागरिक मागत आहेत.

आरोग्य धोक्यात, प्रशासन शांत?

गेल्या अनेक दिवसांपासून गढूळ पाण्याचा पुरवठा होत असल्याने अनेक नागरिकांना पोटाचे विकार, जुलाब, उलट्या यांसारख्या तक्रारींचा सामना करावा लागत असल्याची माहिती समोर येत आहे. “पाणी जीवन आहे; पण तेच पाणी आजाराचे कारण ठरू लागले, तर त्याहून मोठी शोकांतिका कोणती?” असा सवाल नागरिक उपस्थित करत आहेत.
लाखो रुपयांचा खर्च… तरीही नागरिकांची तहान कायम
शहराच्या पाणीपुरवठा व्यवस्थेवर लाखो रुपयांचा खर्च करण्यात आला. टाक्या स्वच्छ करण्याचे दावेही करण्यात आले. मात्र, प्रत्यक्षात परिस्थिती बदलली नसल्याने नागरिकांच्या मनात नाराजी वाढत आहे. केवळ घोषणा आणि प्रसिद्धी यापेक्षा प्रत्यक्ष परिणाम महत्त्वाचा असल्याचे मत सर्वसामान्यांकडून व्यक्त होत आहे.

जनतेचा थेट सवाल

“सत्ता दिली विश्वासाने, परतावा मिळाला निराशेने?” असा सवाल आता अमळनेरकर विचारत आहेत. बदलाच्या अपेक्षेने जनतेने दिलेल्या मतांचा मान राखायचा असेल, तर पाणीपुरवठ्याचा प्रश्न तातडीने सोडविणे ही काळाची गरज असल्याचे मत नागरिक व्यक्त करत आहेत.