बातमी प्रसिद्ध होऊनही कारवाईचा अभाव; पारोळ्यात सट्टा व्यवसाय सुरूच

पारोळा : शहरात सुरू असलेल्या कथित सट्टा-मटका व्यवसायाबाबत दिव्य लोकतंत्रने रविवारी वृत्त प्रसिद्ध करून संबंधित यंत्रणेचे लक्ष वेधण्याचा प्रयत्न केला होता. या वृत्तात सट्टा व्यवसायाशी संबंधित असल्याचा आरोप असलेल्या व्यक्तीबाबतही माहिती देण्यात आली होती. मात्र बातमी प्रसिद्ध झाल्यानंतरही परिस्थितीत कोणताही बदल झालेला दिसून येत नाही.

शहरातील काही भागांत आजही उघडपणे सट्टा सुरू असल्याचा दावा स्थानिक नागरिकांकडून केला जात आहे. त्यामुळे पोलिस प्रशासनाने या प्रकाराकडे दुर्लक्ष केले आहे का, असा प्रश्न उपस्थित होत आहे.

“कायद्याचा धाक सर्वांसाठी समान असतो; मग येथे अपवाद का?” असा सवाल नागरिक विचारत आहेत. जर बातमी प्रसिद्ध होऊनही संबंधितांवर कारवाई होत नसेल, तर यामागे नेमके कारण काय, याबाबतही विविध तर्कवितर्क लावले जात आहेत.

यामुळे “सट्टा किंग भोई बाप्पावर हात कुणाचा?” हा प्रश्न आता पारोळ्यात चर्चेचा विषय ठरत आहे. कायद्याचे उल्लंघन करणाऱ्यांवर तातडीने आणि निष्पक्ष कारवाई होणे अपेक्षित असताना अद्याप ठोस पावले उचलली गेली नसल्याची भावना नागरिक व्यक्त करत आहेत.

अवैध व्यवसायांविरोधात कठोर भूमिका घेण्याची जबाबदारी पोलिस प्रशासनाची आहे. त्यामुळे या प्रकरणाची सखोल चौकशी करून वस्तुस्थिती समोर आणावी आणि दोषी आढळल्यास कायद्यानुसार कारवाई करावी, अशी मागणी नागरिकांकडून होत आहे.