अमळनेर तालुक्यातील करणखेडे येथील धक्कादायक घटना

अमळनेर : तालुक्यातील करणखेडे येथील एका इसमाने आपल्या शेतात जाऊन पेट्रोल ओतून स्वतःला जाळून घेऊन जीवन संपवल्याचा धक्कादायक प्रकार काल घडला आहे. या इसमाचा आज रविवारी सकाळी धुळे जिल्हा रुग्णालयात उपचार सुरू असतांना मृत्यू झाला.

या बाबत सविस्तर वृत्त असे की, अमळनेर तालुक्यातील करणखेडे येथील महेश बारीकराव पाटील (वय सुमारे 40 ते 45) हा त्याच्या परिवाराच्या उदरनिर्वाहसाठी सुरत येथे राहत होता. शेतीच्या कामानिमित्त तो गेल्या दोन दिवसांपूर्वी आपल्या गावी करणखेडे येथे आला होता. मात्र शनिवारी सकाळी त्याने शेतात जाऊन आपल्या अंगावर पेट्रोल ओतून स्वतःला जाळून घेत आत्महत्या करण्याचा प्रयत्न केला होता. त्याला अमळनेर येथील ग्रामीण रुग्णालयात उपचारासाठी दाखल केले असता तेथून त्याला पुढील उपचारासाठी धुळे जिल्हा रुग्णालयात पाठवण्यात आले होते. मात्र आज रविवारी सकाळी त्याच्या दुर्दैवी मृत्यू झाला.

दरम्यान महेश याच्यावर कर्ज झाले असून त्याच्या नैराश्यातून त्याने आत्महत्या केली असल्याचे त्याच्या नातलगांचे म्हणणे आहे.