अमळनेरसह चोपड्यातील चार महसूल कर्मचारी निलंबित

अमळनेर : तालुक्यातील सावखेडा येथील वाळू ठेका आणि अवैध डिझेल साठा प्रकरणात जिल्हा प्रशासनाने कठोर भूमिका घेत मोठी प्रशासकीय कारवाई केली आहे. या प्रकरणी जबाबदारी निश्चित करत अमळनेर आणि चोपडा तालुक्यातील प्रत्येकी एक मंडळ अधिकारी व एक ग्राम महसूल अधिकारी (तलाठी) अशा एकूण चार महसूल कर्मचाऱ्यांना निलंबित करण्यात आले आहे. याबाबतचे आदेश जिल्हाधिकारी कार्यालय, जळगाव यांच्यामार्फत जारी करण्यात आले आहेत.

सावखेडा परिसरातील वाळू ठेक्याच्या कामकाजादरम्यान नियमभंग, देखरेखीतील त्रुटी तसेच अवैध डिझेल साठ्याबाबत गंभीर बाबी निदर्शनास आल्यानंतर प्रशासनाने या प्रकरणाची सखोल चौकशी सुरू केली होती. चौकशीदरम्यान महसूल विभागाच्या स्थानिक पातळीवरील नियंत्रण आणि देखरेखीबाबत अनेक प्रश्न उपस्थित झाले होते.

प्राथमिक चौकशीत संबंधित महसूल अधिकाऱ्यांकडून कर्तव्यात हलगर्जीपणा झाल्याचे आढळून आल्याने अमळनेर तालुक्यातील एक मंडळ अधिकारी व एक तलाठी तसेच चोपडा तालुक्यातील एक मंडळ अधिकारी व एक तलाठी यांच्यावर निलंबनाची कारवाई करण्यात आल्याची माहिती मिळाली आहे.
विशेष म्हणजे, या प्रकरणातील कारवाई केवळ कनिष्ठ अधिकाऱ्यांपुरती मर्यादित राहणार नसल्याची चर्चा प्रशासकीय वर्तुळात सुरू आहे. संबंधित काळातील वाळू ठेक्यावरील देखरेख, महसूल यंत्रणेचे नियंत्रण आणि वरिष्ठ पातळीवरील जबाबदारी याबाबतही छाननी सुरू असल्याचे सूत्रांचे म्हणणे आहे.

दरम्यान, अमळनेरच्या तत्कालीन किंवा संबंधित तहसीलदारांच्या भूमिकेबाबतही शासन स्तरावर माहिती मागविण्यात आल्याचे बोलले जात आहे. त्यामुळे तहसीलदारांवरही कारवाईची टांगती तलवार असल्याची चर्चा असून, राज्य शासनाकडून यासंदर्भात लवकरच निर्णय होण्याची शक्यता व्यक्त केली जात आहे.

या कारवाईमुळे जिल्ह्यातील वाळू उत्खनन, वाहतूक आणि महसूल विभागाच्या कार्यपद्धतीबाबत पुन्हा एकदा प्रश्न उपस्थित झाले आहेत. जिल्हा प्रशासनाने मात्र नियमांचे उल्लंघन आणि कर्तव्यातील दुर्लक्ष सहन केले जाणार नसल्याचा स्पष्ट संदेश दिला आहे.

सावखेडा प्रकरणात पुढे आणखी काही अधिकारी, कर्मचारी किंवा संबंधित ठेकेदारांवर कारवाई होणार का, याकडे आता संपूर्ण जिल्ह्याचे लक्ष लागले आहे.