अमळनेरकरांसाठी विकास, दिलासा आणि पारदर्शक कारभाराची हमी

अमळनेर : आगामी सार्वत्रिक निवडणूक २०२५ च्या पार्श्वभूमीवर शिवसेना (एकनाथ शिंदे गट)तर्फे पुढील पाच वर्षांसाठीचा व्यापक वचननामा शनिवारी उत्साहात जाहीर करण्यात आला. शहराच्या सर्वांगीण विकासाला वेग देण्यासाठी आणि नागरिकांच्या वास्तव गरजांवर थेट लक्ष केंद्रित करणारा हा वचननामा तयार केल्याचे यावेळी सांगण्यात आले.

या कार्यक्रमाला मा. आमदार शिरीष चौधरी, नगराध्यक्ष पदाचे उमेदवार डॉ. परीक्षित बाविस्कर, तसेच सर्व नगरसेवक पदाचे उमेदवार उपस्थित होते. कार्यक्रमाला उपस्थित नागरिक आणि कार्यकर्त्यांनी उत्स्फूर्त प्रतिसाद दिला.

यावेळी बोलताना आमदार चौधरी म्हणाले, “हा जाहीरनामा नसून अमळनेरकरांना दिलेले ठाम वचन आहे. गेल्या काही वर्षांत नागरिकांना भेडसावणाऱ्या समस्यांचा अभ्यास करून, त्यावर प्रत्यक्षात उपाययोजना करणारा आणि अमळनेरला बदलाची दिशा देणारा हा वचननामा आहे.”

शहरातील मूलभूत सुविधांना प्राधान्य

वचननाम्यात शहराच्या पाणीपुरवठ्याच्या समस्येवर विशेष भर देण्यात आला आहे.
स्वच्छ, शुद्ध आणि नियमित पाणीपुरवठा हा प्रथम प्राधान्याचा विषय ठरवण्यात आला असून प्रत्येक घरापर्यंत योग्य दाबाने पाणी मिळावे यासाठी नव्या पाइपलाइन, जलसाठा व दाबवाढ यंत्रणा उभारण्याचे नियोजन करण्यात येणार आहे.

यासोबतच नागरिकांवरील अवाजवी करवाढ आटोक्यात आणणे आणि शहरावर लादण्यात आलेल्या १०० कोटींच्या करबोजातून मुक्तता मिळवण्यासाठी प्रयत्न करण्याचे आश्वासन देण्यात आले आहे.

अतिक्रमणग्रस्तांसाठी दीर्घकालीन उपाय

शहरातील मोठ्या प्रमाणात असलेल्या अतिक्रमण समस्येवर लक्ष केंद्रीत करून
कायमस्वरूपी व न्याय्य पुनर्वसनाची योजना राबविण्याची घोषणा करण्यात आली.

अतिक्रमित घरांना जमीनपट्टे देताना नागरिकांना आर्थिक दिलासा देण्यासाठी खालील प्रमाणानुसार शुल्क आकारले जाणार आहे —

५०० चौ.फु.पर्यंत : विनामूल्य

५००–१००० चौ.फु. : केवळ १०% रक्कम

१०००–१५०० चौ.फु. : केवळ २५% रक्कम

घराचे कायदेशीर हक्क मालकांच्या नावे नोंदवून देण्याची हमीही या वेळी देण्यात आली.

युवा, विद्यार्थी व व्यापाऱ्यांसाठी विशेष उपक्रम

शहरातील विद्यार्थ्यांना स्पर्धा परीक्षांची तयारी करण्यासाठी प्रोत्साहन म्हणून प्रत्येक प्रभागात अभ्यासिका उभारण्याची घोषणा करण्यात आली. आधुनिक सोयींसह अभ्यासिकांमुळे अनेक विद्यार्थ्यांना लाभ होणार असल्याचे सांगितले गेले.

व्यापाऱ्यांसाठीही मोठे निर्णय जाहीर करण्यात आले असून

नगरपरिषद मालकीची दुकाने ९ वर्षांच्या कराराने देणे,

दुकानांच्या हस्तांतर फीमध्ये कपात,
यामुळे व्यापाऱ्यांना स्थैर्य आणि आर्थिक सुरक्षितता मिळेल, असा विश्वास व्यक्त करण्यात आला.

शुल्क व करांमध्ये मोठी सवलत

शहरातील विविध भागात आकारली जाणारी लोकवर्गणी पूर्णपणे रद्द करण्याचे महत्त्वाचे आश्वासन वचननाम्यात समाविष्ट आहे.

घरपट्टी आणि पाणीपट्टी वेळेवर भरणाऱ्या नियमित करदात्यांवर आकारले जाणारे २% व्याज रद्द करण्याचा निर्णयही जाहीर करण्यात आला.

तसेच नवीन घर किंवा प्लॉटवरील वर्गणी २% वरून ०% ते १% इतकी कमी करण्याचा निर्णय नागरिकांसाठी दिलासा देणारा ठरणार आहे.

डिजिटल सुविधा आणि स्वच्छतेला चालना

विवाह नोंदणी प्रक्रिया पुन्हा नगरपरिषदेकडे आणण्यात येणार असून डिजिटल बारकोडसह प्रमाणपत्रांची सुविधा देण्यात येईल.

शहर स्वच्छतेसाठी आधुनिक घनकचरा व्यवस्थापन प्रकल्प उभारण्यात येणार असून नवीन तंत्रज्ञानाचा वापर करून कचरा व्यवस्थापन अधिक प्रभावी करण्यावर भर दिला जाणार आहे.

अमळनेरच्या बदलाचे वचन

अमळनेरच्या सर्वांगीण विकासासाठी हा वचननामा मार्गदर्शक ठरेल, असा विश्वास कार्यक्रमात व्यक्त करण्यात आला.
पाणीपुरवठा, स्वच्छता, करसवलती, पुनर्वसन, शिक्षण, डिजिटल सुविधा, व्यापाऱ्यांसाठी उपयुक्त धोरणे अशा सर्वच क्षेत्रांत ठोस उपाययोजना करत नागरिक-केंद्रित कारभार करण्याचा निर्धार यावेळी करण्यात आला.