साहेबराव पाटील वाजवतील तुतारी की पुन्हा घेतील शिट्टी….
राष्ट्रवादी – शरद पवार गटाकडून साहेबराव पाटलांच्या उमेदवारीची शक्यता
अमळनेर : मतदार संघात आगामी विधानसभा निवडणुकीसाठी अनेक मातब्बर नेते उमेदवारी करण्याची शक्यता असून त्या पद्धतीने त्यांची तयारी देखील सुरु आहे. पक्ष कमी आणि उमेदवार जास्त अशी परिस्थिती होण्याची देखील शक्यता आहे मात्र आघाडी आणि युतीमुळे अनेकांना आघार घ्यावी लागणार आहे. मागील पंचवार्षिक निवडणुकीत अमळनेर मतदार संघाची जागा आघाडी कडून राष्ट्रवादीला गेली असल्याने यावर्षी काँग्रेस अमळनेरसाठी आग्रही आहे. तर जवळ – जवळ सगळ्याच पक्षांनी आपापल्या उमेदवारांची जुडवणी केली असून राष्ट्रवादी शरद पवार गटाकडेही सुमारे अर्धा डझन उमेदवार असल्याची माहिती खात्रीशीर सूत्रांकडून मिळाली आहे. यात माजी आमदार कृषिभूषण साहेबराव पाटील यांचे देखील नाव आहे.
अमळनेर विधानसभा मतदार संघाचे माजी आमदार कृषिभूषण साहेबराव पाटील यांनी २००९ साली अपक्ष म्हणून उमेदवारी केली होती त्या नंतर ते आमदार झाले व राष्ट्रवादी काँग्रेसचे सहयोगी सभासद झाले. व राष्ट्रवादीच्या आजीवन सदस्यत्व देखील त्यांनी स्वीकारले असल्याचे सांगितले जाते. म्हणून २०१४ साली त्यांनी राष्ट्रवादी काँग्रेस पक्षाकडून उमेदवारी केली. मात्र त्यांचा तेव्हा पराभव झाला. तर त्यांनी २०१९च्या विधानसभा निवडणुकीत उमेदवारी केली नव्हती. मात्र आता २०२४च्या विधानसभा निवडणुकीत त्यांनीही कंबर कसलेली दिसून येत असून त्यांच्यादेखील भेटीगाठी सुरू झाल्या आहेत. मात्र यावेळेस कृषिभूषण पाटील तुतारी वाजवत शरद पवार गटाकडून उमेदवारी घेतात की त्यांच्या मागील निवडणूक चिन्हावर शिट्टी वाजवत अपक्षच लढतात हे येत्या काळात स्पष्ट होईल.
