शासनाची लूट व जनतेची पिळवणूक करणाऱ्यांना तिकीट देताना पक्षांनी विचार करावा – नागरिकांचा इशारा

अमळनेर : आगामी नगर परिषद निवडणुकीच्या पार्श्वभूमीवर शहरात राजकीय वातावरण चांगलेच तापू लागले आहे. विविध गट–तट कार्यरत झाले असून, या वेळी काही संशयास्पद आणि गैरव्यवहारांशी संबंधित व्यक्ती रिंगणात उतरण्याची शक्यता व्यक्त केली जात आहे. त्यात एक वाळू माफिया आणि रेशन माफिया गौरव व विजय या नावांचा विशेषतः उल्लेख होत आहे.

या तिघांवर अवैध व्यवहारांशी संबंधित गंभीर आरोप असल्याचे स्थानिक नागरिकांचे म्हणणे आहे. आबा यांनी गेल्या काही वर्षांत मोठ्या प्रमाणावर अवैध वाळू उपसा करून शासकीय महसुलाला कोट्यवधी रुपयांचा फटका दिला असल्याचे आरोप आहेत. वाळूच्या नावाखाली चालणाऱ्या या बेकायदेशीर धंद्यामुळे नदीपात्रांचे पर्यावरणीय संतुलन बिघडले असून, अनेक ठिकाणी भूगर्भजलपातळी घटल्याचेही निदर्शनास आले आहे.

दुसरीकडे, गौरव आणि विजय या दोघांवर रेशनिंग योजनेतील अनियमिततेचे आरोप आहेत. नागरिकांना स्वस्त धान्य वितरणात फसवणूक, वजनात तफावत तसेच अन्नधान्य काळ्या बाजारात वळविणे अशा तक्रारी गेल्या काही वर्षांत अनेक वेळा समोर आल्या आहेत. या प्रकारांमुळे गरिब जनतेला योग्य लाभ मिळण्याऐवजी त्यांची पिळवणूक झाल्याचे नागरिकांचे मत आहे.

शहरातील सामाजिक कार्यकर्ते आणि जागरूक नागरिकांनी या पार्श्वभूमीवर राजकीय पक्षांना इशारा दिला आहे की, “जनतेच्या विश्वासाचा गैरवापर करणाऱ्या, शासनाची संपत्ती लुटणाऱ्या आणि गरीबांचा हक्क खाणाऱ्या व्यक्तींना पक्षांनी तिकीट देताना शंभर वेळा विचार करावा.”

निवडणुकीच्या अनुषंगाने मोठ्या आर्थिक देवाणघेवाणीची शक्यता व्यक्त केली जात आहे. काही राजकीय गट हे उमेदवार मतदारसंघातील पैशाच्या आणि प्रभावाच्या जोरावर उभे करण्याचा प्रयत्न करत असल्याची चर्चा शहरात सुरू आहे. या परिस्थितीत नागरिकांनीही सजग राहून अशा प्रवृत्तींचा निषेध करावा, अशी मागणी सामाजिक संघटनांकडून होत आहे.

अनेकांनी स्पष्टपणे म्हटले आहे की, “जनतेच्या पैशावर डल्ला मारणारे आणि शासनाच्या यंत्रणेला वाकवणारे जर नगरपरिषदेत आले, तर शहराचा विकास अडचणीत येईल.” त्यामुळे या निवडणुकीत मतदारांनी आपले मत हे शस्त्र म्हणून वापरून योग्य, प्रामाणिक आणि समाजहिताची जाणीव असलेल्या उमेदवारांनाच निवडून द्यावे, अशी भावना जनतेत व्यक्त होत आहे.

या चर्चेमुळे अमळनेर नगर परिषद निवडणूक अधिक रंगतदार होण्याची चिन्हे दिसत आहेत. पुढील काही दिवसांत पक्ष कोणाला उमेदवारी देतात, याकडे सर्वांचे लक्ष लागले आहे.