आधी आत्मनिरीक्षण करा भाऊ

आपल्या सारख्या परिपक्व राजकारणीकडून अशी अपेक्षा नाही….

अमळनेर : येथे काल श्रीकांत शिंदे यांची सभा झाली. आणि या सभेत पालकमंत्री गुलाबराव पाटील यांचा बोलतांना तोल सुटला. पत्रकारांना काय म्हणून लोक ओळखतात, असे म्हणत नगराध्यक्ष पदाचे उमेदवार तोडीपाणी पत्रकार आहेत असे म्हणत पत्रकारांचा अपमान केला आहे. इतरांना तोडीपाणी म्हणणारे गुलाबभाऊ पानटपरीवर पान विकून करोडपती झाले का असा सवाल अनेक बुद्धिजीवी व राजकीय जाणकार विचारू लागले आहेत. मंत्री गुलाबराव पाटील यांची अनेक कोटी रुपयांची मालमत्ता आहे. आणि हे पानटपरी चालवायचे असे त्यांनी अनेक वेळा भाषणात सांगितले आहे. तर पानटपरीवाला माणूस न तोडीपाणी करता , न टक्केवारी खाताच करोडपती झाला यात कुणाचेही दुमत नाही.

पालकमंत्री गुलाबराव पाटील हे हुशार व परिपक्व राजकारणी आहेत. त्यांच्यासारख्या हुशार व परिपक्व राजकारणींकडून अशी भाषा व बिना महितीच्या आधारे अथवा कुणी सांगितल्याच्या आधारे किंवा जनतेच्या टाळ्या मिळवण्यासाठी एखाद्यावर लांच्छन उडवणे कितपत योग्य आहे. म्हणून गुलाबभाऊ तुम्ही आधी आपले उमेदवार, आपले अमळनेर मधील नेते व आपले आत्मपरीक्षण करावे असे मत अनेक बुद्धीजीवी अमळनेरकर नागरिकांनी व्यक्त केले आहे.